Миний нээлттэй тэмдэглэл

Оффлайнаар андройд хөгжүүлэлтийн орчин бэлтгэх

2011-03-29T15:11:00.004+08:00

Гэрт интернэтгүй үед Андройд SDK-г суулгах шаардлага хэд хэдэн удаа гарсан юм. Энэ асуудлыг хүмүүс дараах байдлаар шийдсэн байна.

Алхам1. Шаардлагатай файлуудыг интернэттэй ямар нэг компютерээр татаж авна. Үүнд:

- ADT Plugin:
Eclipse-н ADT plugin (http://dl.google.com/android/ADT-10.0.1.zip)

- Android SDK:
http://dl.google.com/android/android-sdk_r10-linux_x86.tgz (өөрийн үйлдлийн системд тохируулж сонгоно)

- Android Platform 2.1:
http://dl-ssl.google.com/android/repository/android-2.1_r02-linux.zip файлыг татна.
Үйлдлийн систем, андройд платформоос хамаараад энэ хаягын төгсгөл хэсэг ялгаатай байж болно. Тиймээс http://dl-ssl.google.com/android/repository/repository.xml хаягаар орж өөрийн сонголтоо хийгээрэй. Энэ xml-н төгсгөл орчимд платформын нэрс байгаа бөгөөд сонирхож байгаа нэрээ олоод дээрх холбоосын "android-2.1_r02-linux.zip" нэрний оронд бичээд татаж авна.

Энэ дашрамд хэрэв Eclipse болон Жава байхгүй бол интернэттэй байгаа дээрээ татаад авах хэрэгтэй.

Алхам2. ADT plugin-г Eclipse дээр суулгана.

Eclipse дээр Help -> Install new software гэж ороод Add товчийг дарна.Гарч ирсэн Add repository цонхон дээр Name=ADT, Location=ADT-10.0.1.zip файлын замыг заана. Ингээд суулгана.

Алхам3. Android SDK суулгах

Татаж авсан Android SDK файлаа нэг газар задлана. Дараа нь Eclipse дээрээ Window -> Preference -> Android гэж ороод SDK асуусан хэсэгт нь задласан хавтасаа заана.

Алхам4. Android Platform нэмэх

Android SDK байрлаж байгаа хавтасны platforms хавтас дотор татаж авсан android-2.1_r02-linux.zip файлын агуулгыг задлаж хуулна.

Ингээд дууслаа.

Ерланг: Морины нүүдэл

2009-10-07T22:39:00.003+08:00

Шатрын хөлгийг морины нүүдлээр дүүргэх бүх боломжуудыг олох бодлого хамгийн анх рекурсивыг ойлгоход тусалж байсан санагдаж байна. Энэ бодлогын шийдлийг Ерланг дээр хийж үзэв.


-module(horse_move).

-export([start/0, move/1]).

start() ->
 move([{1,1}]).

move(Path) when length(Path)==64 ->
 io:format("~w~n", [Path]), % display the result
 ok;
move([{X,Y}|_]) when X < 1; X > 8; Y < 1; Y > 8 ->
 ko;
move([{X,Y}|T]=Path) ->
 Dup = lists:member({X,Y},T), % өмнө нүүсэн эсэх
 if 
  Dup -> ko;
  true ->
   % io:format("~w, len=~w~n", [{X,Y}, length(Path)]),
   move([{X-2,Y-1}|Path]),
   move([{X-1,Y-2}|Path]),
   move([{X+1,Y-2}|Path]),
   move([{X+2,Y-1}|Path]),
   move([{X+2,Y+1}|Path]),
   move([{X+1,Y+2}|Path]),
   move([{X-1,Y+2}|Path]),
   move([{X-2,Y+1}|Path])
 end.

Си кодтой харьцуулахад гайгүй товчхон, цэгцтэй харагдаж байна шүү.

Дараагийн алхамд тооцооллыг яаж параллель болгох вэ гэж эргэцүүлэв. Олон салаагаар орж нүүдлүүдийг шалгах үйлдлийг зэрэг/параллель хийвэл үр дүнтэй байх болов уу. Гэхдээ салаа зам олох үйлдэл нь их энгийн товч болохоор параллель ажиллуулах нь үр дүнтэй байж чадах уу. Процессыг эхлүүлэхэд Ерланг маш богино хугацаа зарцуулдаг гэж байгаа боловч тодорхой хэмжээгээр хугацаа орох л байх.

Нэг завандаа параллель хувилбарыг хийж үзнэ дээ.

Бидний хүүхдэд хэн, юу заагаад байна вэ?

2009-09-22T14:11:00.000+08:00

Дунд сургуульд худлаа ярьж, мэлзэхийг багш нь биеэр үзүүлж байна.

Өнөөдөр нэг ийм явдал болов. Охиныг (манай охин энэ жил 2-р ангид сурч байгаа) сургуулиас нь авахаар очиход ангийнхаа нэг охинтой хамт гарч ирсэн гэнэ. Хацар дээр нь гурван том хурууны мөр гарчихсан улаан болсон байхаар нь эгч нь яасан бэ гэж асуухад хамт явсан охин нь ангийн багш алгадсан гэсэн байна.

Гэртээ ирэхэд би гэрт байсан тул бас юу болсныг асуув. Тэгээд ээжид нь хэлсэнд ээж нь ангийн багш руу нь ярьж энэ тухай асуужээ. Гэтэл багш хүүхэн "Ёстой тийм юм байхгүй, би зүгээр л куртикнээс нь угзарсан, би тийм хүн биш" гэж мэлзсэн байна.

Харахад илэрхий байхад ингэж хэлсэнд гэнэт миний уур хүрэв. Багш руу нь залгасанд би тэгээгүй гэж бас л мэлзэж байна, тэгснээ бас за яахав алгадсан болог, тийм зүйл байдаг л биз дээ гэж байна, бас дараа нь алгадаагүй гэж хэлж үзэж байна.

Яахав дунд сургуульд байхад багш нар алгадаж л байсан, тоохгүй өнгөрдөг л байсан. Манай эрэгтэй дүүд яг тийм юм тохиолдсон юм. Эрэгтэй багш нь чих рүү нь алгадаад хэнгэрэгийг нь хагалсан. Ээж, аав хоёр өөрөө дүрсгүй юм болохоор нь юм хэлэлгүй өнгөрөөсөн юмдаг. Гэхдээ одоо чихнээс нь идээ бээр гоождог зовлонтой хүн.

Багштай нь утсаар ярьсны дараа нь би мэдэж байсан ч охиноосоо зориуд багш чинь чамайг алгадаагүй л гэж байна ш дэ. Чи худлаа яриад байгаа юм уу гэж асуулаа. Охин түрүүнээс хойш намайг ээж рүү, багш руу нь ярихад цааргалаад битгий гээд байсанд би дээрээс нь ингэж асуусанд тэссэнгүй нүдэнд нь нулимс цийлэгнээд хөшигний цаагуур орчихов.

Аргагүй л дээ, багш нь яаж худлаа ярьж, мэлзэж болдогыг 6, 7 настай хүүхдүүдэд өөрийн биеэр үзүүлж байхад. Ирээдүйн Монголын залгамж халааг бэлдэж байгаа сургууль гэдэг байгууллага нэг иймэрхүү. Сургууль юм заахаа больсон гэж хүмүүс ярьдаг л юм. Боловсон хүчин дутмаг зэргээс болоод чадвар хир тааруу хүмүүс ордог л байх (бүх багш нар тийм биш л дээ). Гэхдээ балчир хүүхдүүдэд манай нийгмийн муу, муухай болгоныг ингэж биеэр зааж яах нь вэ. Ямар ухамсарын дорой түвшинтэй хүмүүс бидний үр хүүхдэд юм заагаад байнаа.

Би алгадсанд нь биш худлаа ярисанд нь бачимдсан гэдгээ ойлгуулах гэсэн боловч багш нь ойлгох шинжгүй байсан. Маргааш ирж уулз гэж даналзаж байна. Маргааш охиныг ховлолоо гэж дарамталж мэдэх хүн байна, тэр багш нь. Очиж уулзах хэрэгтэй болох нь. Уулзаад ч үр дүн нь хэр байх юм болдоо. Аймаар юм.

Ерланг: Дараалсан болон Зэрэгцээ кодын ажиллагааны харьцуулалт

2009-09-15T17:23:00.000+08:00

Сонин болгоод өгөгдсөн N тоо хүртэлх төгс тоог олох програмыг шугаман байдлаар Ерланг дээр хийж үзэв.


-module(perfect_number).
-export([gen/1]).

gen(N) when N<6 -> [];
gen(N) ->
  [P || P <-lists:seq(6,N,1), P=:=lists:sum([E || E <-lists:seq(1,P-1,1), P rem E == 0])].

Дараа нь энэ алгоритм дээр ямар ч өөрчлөлт хийлгүйгээр зөвхөн параллель ажиллагаатай болгов. Ө.х жагсаалт дэх нэг элементийг төгс тоо эсэхийг шалгаж байхтай зэрэгцэн дараагийн элементийг төгс эсэхийг шалгана гэсэн үг.


-module(perfect_number).
-export([gen_para/1]).

gen_para(N) when N<6 -> [];
gen_para(N) -> 
 lists:filter(fun(E) -> {X,Y}=E, X=:=Y end, 
   parmap(fun(P) -> {P, lists:sum([E || E <-lists:seq(1,P-1,1), P rem E == 0])} end, lists:seq(6,N))).

%% Map function F over list L in parallel.
parmap(F, L) ->
 Parent = self(),
 [receive {Pid, Result} -> Result end
  || Pid <- [spawn(fun() -> Parent ! {self(), F(X)} end) || X <- L]].

Хоёр цөмтэй процессор дээр бага тоо өгч ажиллуулахад энэ хоёрын хооронд бараг ялгаа харагдахгүй байна. Тоог ихэсгэхэд ажиллах хугацаа нь мэдэгдэхүйц ялгаатай болж байв.

Ямар ч гэсэн Ерланг нь олон процессоруудын хувьд давуу тал бий болгож байна. Диск төхөөрөмжийн хурдыг сайжруулчихвал олон цөмт процессор хүчтэй юмаа.

Multi core processor

2009-09-14T20:12:00.000+08:00

Нэлээд их хэмжээний өгөгдөл дээр боловсруулалт хийдэг биллинг зэрэг системүүд дээр "хурд хурд бас дахин хурд" гэсэн зарчмыг барихаас өөр аргагүй болдог. Системийнхээ бүхий л эд эсүүдийг максимум хурд гаргахын тулд зохиомжлоно. Өгөгдлийн сан дээр оновчлолт хийнэ, алгоритмаа сайжруулна, илүү санагдсан бүх кодыг танана. Гэлээ гээд НЭГ КОМПЬЮТЕР-н хийж чадах ажлын хэр хэмжээ хязгаартай байдгийг ойлгосон юм.

Гэтэл байдал өөр болж байнаа... Нэг процессор дотор бүхэл бүтэн процессоруудын сүлжээ бий болгоод даалгаврыг нэгэн зэрэг гүйцэтгэж чадах олон цөмт процессорууд гарч ирсэн байна.

Dual core (2 core), Quad (4 core) гээд олон цөмтэй процессерууд зах зээл дээр аль хэдийн гарч ирсэн байна. Цаашлаад яаж хөгжих юм бол гээд нэт ухсан чинь 80 цөмтэй процессорын тухай бүр 2006 онд ярьж байсан байх юм.

Гэтэл бидний програмчлах хэв маяг дараалсан хандлагатай (sequential) байсаар л байна. Сүүлийн үеийн програмчлалын хэлүүдэд трэд зэрэг кодыг параллелиар (concurrent) ажиллуулах боломжууд байгаа боловч "санаанд хүрэхгүй" байна. Учир нь олон трэдүүд параллелиар ажилладаг гэх боловч цаана нь тэдгээрийн дунд нөөцийг эвдэхээргүй зохицуулалт хийх гэх мэтийн шалтгаанаас болоод дахиад "оочер" үүсгэнэ. Энэ "оочер" нь дахиад л нөгөө уламжлалт дараалсан кодоос илүү гарахгүй нөхцөл байдалд оруулна.

Аз болоход үүнийг эртээ мэдэж байсан хүмүүс олон цөмт процессоруудад зориулсан Ерланг нэртэй програмчлалын хэлийг гаргасан байх юм. Судлаад үзсэн чинь маш их таалагдав. Нэг л өөр юмаа. RAISE хэл дээр формаль код бичиж байсан маань санагдав. "Бүх зүйл бол процесс, Чиний амьдрал ч процесс, ОХП гэж байхгүй, Хувьсагч гэж байхгүй, Дундын санах ой гэж байхгүй, Яг бодит амьдрал дээр процесс яаж өрнөдөг, түүнийг дууриаж бод" гэнэ. Бүх зүйлийг процессоор сэтгээд бодсон чинь болж байнаа. Давгүй санагдаж байна. Зарим шугаман кодуудаа багахан өөрчлөлт хийгээд параллель ажилладаг болгон хурдыг нь харьцуулж үзэхэд илэрхий хурдтай ажиллаж байна.

Програмчлалын хандлага нэлээд өөр болох нээ...

C# .NET II Ном

2009-09-14T19:45:00.000+08:00

C#.NET II номоо өнөөдрөөс худалдаанд гаргалаа. Номоо одоогоор Интерном, Билэг их дэлгүүр, Ачлал дэлгүүрүүд дээр тависан байгаа.

Энэ хоёрдугаар номонд ADO.NET, .NET Remoting, ASP.NET, Web service технологиудын талаар тайрбарласан. Виндоус, Линакс аль ч орчинд байсан ялгаагүй програмчлалын тулгуур ойлголтуудыг сайтар ойлгох нь чухал юм. Тэр утгаараа вэб програм, вэб үйлчилгээ, трэд, параллель програмчлал, өгөгдлийн сантай ажиллах тулгуур ойлголтуудыг энэ номоос мэдэж болно.

C# ба .NET ном

2009-01-27T15:29:00.000+08:00

"C# ба .NET" нэртэй цуврал номуудаа бичиж дуусгалаа. Эхний ном нь ирэх 2 дахь өдрөөс эхлэн худалдаанд гарна.

Өмнөх үг
===========================================================
“C# ба .NET” нэртэй цуврал 2 номыг та бүхэнд хүргэж байгаадаа их баяртай байна. Энэ номондоо .NET технологи болоод C# (C Sharp) хэлний талаар хамгийн гол зүйлсийг багтаан оруулахыг хичээлээ. Тиймээс C# хэлний дүрэм, Объект Хандлагат Програмчлалын үндэс, Програмчлалын үндсэн ойлголтуудын талаар багахаан хэсгийг оруулсан болно.

Энэхүү ном нь өмнө нь компьютерийн програмчлалын ямар нэг хэлний туршлагатай бөгөөд .NET технологийг сурахаар сонирхож байгаа хүмүүст зориулагдсан болно. Ялангуяа C/C++, Java хэлүүд дээр өмнө нь туршлагатай хүмүүсийн хувьд C# хэлийг сурахад маш хялбархан байх болно гэдгийг онцлоё.

Энэ ном нийт 9 бүлэгтэй. Эхний бүлгүүдэд C# хэлний үндэс болоод .NET технологийн талаар тойм танилцуулга хийсэн байгаа. Цаашлаад Текст, файлтай ажиллах, Цонхтой дэсктоп програмууд бүтээх, .NET графикийн үндэс GDI+, Фонт, Хэвлэгчтэй ажиллах зэрэг бүлгүүдийг хамрана.

Номын дараагийн цуврал нь мөн 9 бүлэгтэй бөгөөд ADO.NET, Асинхрон програмчлал ба Трийд, Кодын хамгаалалт, ASP.NET, .NET Remoting, Сүлжээний тархсан орчны програм бүтээх тухай бүлгүүдийг багтаасан болно.

Номын жишээ програмын эх кодууд бүгд C# хэл дээр бичигдсэн байгаа. C# хэл нь .NET фрэймворктэй хамт "төрсөн" бөгөөд .NET фрэймворкын гол хэсгүүд, компонентууд энэ хэл дээр хийгдсэн байдаг. Тиймээс C# хэлийг .NET фрэймворкын гол хэл болгон сонгон судлах нь зүйтэй гэж бодож байна.

2009 test

2008-12-21T13:19:00.001+08:00

Анхны ном

2007-12-07T12:17:00.000+08:00

"Си хэл" нэртэй өөрийн анхны номоо хэвлэж гаргалаа. Ном маань ерөнхийдөө Си хэлний практик хэрэглээг түлхүү оруулсан, платформоос үл хамаарах програм зохиоход голлон анхаарч бичигдсэн.

Номын өмнөх үгийг шууд хуулж тавив :-)

"Хэдийгээр компьютерийн програмчлалын олон шинэ хэлүүд төрөн гарсаар байгаа боловч Си хэл одоог хүртэл програм зохиогчдын дунд тэргүүлэх байр суурийг эзэлсээр байна. Учир нь Си хэл дээр бичигдсэн програмууд нь хүчтэй, өндөр гүйцэтгэлтэй, платформ хооронд хөрвөн ажиллах чадвартай байдаг. Энэ чадвар нь олон програм зохиогчдын хувьд сонголт нь болдог биз ээ.
Энэхүү номонд Си хэл дээр хэрхэн платформ хамааралгүй програм бичих, програмчлалын практик асуудлуудыг шийдэхэд Си хэлийг хэрхэн ашиглахыг харуулахыг хичээлээ. Номонд UNIX болон MS-DOS/Windows үйлдлийн систем дээр Си програм хөгжүүлэх багажуудын тухай тайлбарласан. Тиймээс та энэ номноос Windows, UNIX, Linux платформууд дээр хэрхэн Си програм бичихийг ойлгож авах болно.
Ном нь зөвхөн Си хэл дээр програмчлах тухай заахгүй. Програм бичих соёл болоод энгийн, ойлгомжтой програмчлах зарчим, програмын орчил, програмын модулийн дизайн, хөрвөх чадвартай програмын зохиомж зэргийг тайлбарлах болно.
Номын сэдэв бүрт тохирсон дасгалууд, жишээ бодолттой бодлогуудыг оруулсан нь Си хэлийг эхлэн суралцагчдын хувьд дадлага хийхэд ихээхэн тус болно гэж найдаж байна. Зохиогч"

Ургийн мод

2007-08-22T11:16:00.000+08:00

Нэлээд эртнээс Silverlight дээр Ургийн мод зурах програм хийе гэж бодож явсан юм. Гэтэл XAML/WPF дээр хийсэн Family.Show нэртэй эх код оллоо. Би яг иймэрхүү хөнгөн, энгийн, авсаархан ургийн мод зурдаг програм бодож байсан.

Эх кодыг хөрвүүлж ажилд оруулаад ашиглаж үзэв. Их аятайхан интерфэйстэй програм болсон байна, мөн хүмүүсийн зураг хөрөг, амьдарч байсан газар орон, нас барсан огноо, намтар түүх гээд чухал мэдээллүүдийг хавсаргаж болж байна.

Нэг орой аавыг хажуудаа суулгаж байгаад ургийн модоо зурах гэж нэлээн суулаа. Аав аз болоход хотод ирсэн байж таарсан юм.

Модон дээр ээж, аав, эрэгтэй эмэгтэй дүү, эхнэр/нөхөр, экс эхнэр/нөхөр, охин, хүү гэсэн хамаарлуудыг холбож болж байна, харин бусад холбоо хамаарлыг оруулж болохгүй байгаа нь жаахан дутагдалтай юм, жишээ нь хүнээс үрчилж авсан тохиолдолд төрсөн эцэг, эхийг нь ургийн модон дээрээ бас дүрсэлж харуулах хэрэг байх юм. Эх код дээр нь өөрчлөлт хийх хэрэг болох нь.

Ургийн мод зурж байх явцад овог (гэр бүл, family) гэсэн ойлголт манай монголчуудад муу хэрэглэгдэж ирсэн нь харагдаж байна. Жишээ нь, аав зүгээр эцэгийнхээ нэрээр овог авсан байх юм. Энэ нь дээшээ хөөгөөд явангууд будлиан үүсгэж байна. Мод бүхэлдээ л нэг овогын бүтэцийг харуулж байх ёстой байтал, хэд хэдэн өөр овог холилдсон юм болж харагдаж байна.

Ургийн модыг дээш хөөж элэнц, хуланцаа мэдэж авахын хүслэн их байсан ч аавын хувьд мэдэж байгаа зүйл нь дээшээ 3 үе яваад л дуусчив. За ямар ч гэсэн ургийн модоо дараа цааш нь үргэлжлүүлнэ дээ.

Линк: http://www.codeplex.com/familyshow

SIM програмчлал

2007-05-24T11:14:00.000+08:00

СИМ-н талаар мэдэж байгаа бага сага зүйлээ бичиж үлдээх нь зөв юм шиг санагдлаа.

СИМ картын тухай товчхон (SIM буюу Subscriber Identification Module)

СИМ карт нь нэг талаар компьютертэй төстэй, өөрийн гэсэн файл системтэй. Файлуудыг нь EF (Elementary File), хавтасуудыг DF (Dedicated File) гэж нэрлэнэ. Файл нь задгай 2-тын файл (TF), шугаман файл (LF), цикл файл (CF) гэж ангилагдана. Компьютерээс ялгаатай нь файл болон хавтасуудыг 3F00, 2760 гэх мэт 2 байт hex тоогоор нэрлэдэг. Жишээ нь: СИМ дээр хүлээн авсан сүүлийн 30 SMS нь 3F00 / 7F10 / 6F3C файлд хадгалагдаж байдаг. Энэ нь 3F00 хавтасын 7F10 хавтас дотор байгаа 6F3C нэртэй файл юм.

Файл систем рүү хандахад нууцлалын түвшнээсээ хамаараад хандах код шаардана, энэ нт компьютерийн файл системийн нууцлалтай төстэй юм, тухайлбал утасны жагсаалт хадгалагддаг файл руу хандахад CHV1 код (бидний мэдэх PIN код) шаардагдана. Энэ файл нь 3F00 / 7F10 / 6F3A зам дээр байрлана. Ерөнхийдөө CHV1, ADM1, ADM2 гэсэн түлхүүрүүд их ашиглагддаг.

СИМ карт нь APDU гэж нэрлэгдэх тусгай протоколоор гар утас болон бусад төхөөрөмжөөс (GSM modem, PC) ирэх командыг ойлгож хүлээж авдаг. APDU-г формат нь дараахь байдалтай:

CLA INS P1 P2 P3

Data

APDU хариу команд нь:

Data SW1 SW2

Эдгээрийн тухай GSM 11.11 баримт бичигт тодорхой дурдсан байгаа учраас энд бичих нь илүү юм байна. Интернэтэд зөндөө материалууд байна. http://www.ttfn.net/techno/smartcards/GSM11-11v6-2.pdf

http://www.etsi.org/

СИМ картад зориулсан програм

Java хэл дээр СИМ-д зориулсан програмыг бичих боломжтой, JDK 1.2-г ашигладаг.

СИМ картан дээр ажиллах програм бичихийн тулд юуны өмнө санах ойн багтаамж нь маш бага гэдгийг бодолцох хэрэгтэй. Манайд ашиглагдаж байгаа СИМ-үүд 4k-128k хүртэл хэмжээтэй байна, одоо голдуу 64K, 128K СИМ-үүдийг ашигладаг. Цаашид энэ хэмжээ өсөж магадгүй, 1G-н СИМ карт хүртэл байдаг.

СИМ нь өөрийн гэсэн JVM-тэй, энд стандарт JVM-ээс ялгаатай зүйл олон бий, нэг том ялгаа нь Garbage Collection хийдэггүй юм билээ. Үүнийг тооцож програмаа бичихгүй бол СИМ дээр хувьсагч, массив санах ойд үүсгээд орхих болно. Ингээд програм ажиллах бүрд энэ нь нэмэгдсээр СИМ дүүрэх болно.

Бичсэн програмаа СИМ рүү бичихэд SIM Alliance Interoperable Loader-г ашиглахад их тохиромжтой. Энэ нь интернэтэд үнэгүй байдаг програм. http://www.simalliance.org/

Сүүлд Мобайль Банкны СИМ програмыг хийх явцад нэлээн зүйлийг олж мэдсэн. Энэ програмаар цэсний гарчгийг динамикаар өөрчлөх, СИМ файл системээс уншилт, бичилт хийх, мэдээллийг кодлох, нууцлах тухай нэлээн зүйл ойлгож авсан.

Дугуйн аялал 3

2007-05-21T11:13:00.000+08:00

Бид 3 дахь удаагийн дугуйн аялалаа зохион байгуулж, сайхан яваад ирлээ. Төв аймгийн Манзушир амралтын газар, 50 км орчим зайтай.

Нэг машин, 5 дугуйчин бэлтгэлээ базааж аянд гарлаа. Умбажаа-н машиныг дүү нь жолоодож явсан юм. Машинд Бооёо, Соко, Лхам, Сувдаа 4-үүлээ явав.

Аялал эхлэхэд Ганбаа, Туяа, Батхуяг, Явуун бидний 5 нөхдүүд гараанаас гарсан боловч нисэхээс цааш гараад Явуун машинд сууж явахаар болов. Явууны дугуй холын аялал хийхэд арай л тохиромжгүй, жижиг дугуйтай байсанаас болсон биз.

Миний хувьд ойрд хөдөлгөөн хийгээгүй болохоор амьсгаадаж, бас өгсүүр газар цуцах шинжтэй болов, аз болоход салхи хойноос байсан болохоор нэлээн таатай байв. Машин маань ойролцоо явах ёстой байтал биднийгээ орхиод аль хэдийн Төв аймаг орсон байлаа. Бид нэг даваа даваад л машин хүлээж байгаа байх гэж горидоно, машин байхгүй. Машинд идэж уух зүйлсээ орхисон нь буруутсан байна. Хоол усгүй Төв аймаг хүртэл гүрийлгэсэнд Умбаж жаахан уур нь хүрсэн байх, Ганбаа-н өчигдөр оройны хийсэн будаатай хуурганы үлдэгдэлийг идэж жаахан хүч оров.

Төв аймаг руу орохын өмнө талын өгсүүр дээр машин маань урдаас гарч ирэв. Тэд аймгийн төвөөр нэлээн тэнэж байгаад ирсэн бололтой.

Цааш нэг их саадгүй явсан боловч Манзушир орох зам нь шороон, дээрээс нь салхи яг урдаас хүчтэй байсан нь биднийг нэлээн цуцаасан. Зарим газар дугуйгаа түрж явав.

Манзуширт машинтай нөхдүүд маань түрүүлж очоод нэг гэр хөлслөөд орцгоосон байв. Биднийг очиход 7 цаг орчим болж байсан боловуу даа. Эрчүүд нь цуйван, бүсгүйчүүд нь хуушуур, 2 хүүхдэдээ бантан захиалж идэцгээв. Хуушуур нь хайраад удсан шинжтэй, ямар ч шөлгүй аргуу, шал дэмий юм. Хоол ер нь тааруухан юм.

Авч явсан махаараа хорхог хийлгэсэн нь харин их гоё болсон. Өглөө нь сүүтэй цайнд хийгээд идэхэд ч үнэхээр сайхан байсан шүү. Шөнө 4 цаг хүртэл тал болж хөзөр тоглоцгоов, бас нэг шил архи ууцгаав.

Өглөө модоор явж, Манзуширын музейг сонирхцгоов. Оюутнууд, бусад амрагчид ер нь нэлээн их байсан. Ойрхон болохоор хүмүүс энд нэлээн их амардаг байж магадгүй юм.

Буцах замд салхи яг өөдөөс салхилж явахад нэлээн хэцүү байсан, гэхдээ өмнөх өдөр нь яваад амьсгаа задарсан байсан юм шиг байгаан, нэлээн эрчтэй явж байсан. Нисэх рүү их хурдан орж ирсэн дэ. Айдасын даваа өгсөхөд нэлээн цуцсан байж магадгүй, бусдаар их сайхан явж ирлээ. Машин маань ч гэсэн ойр ойрхон хүлээж зогсоод ус, идэх юмаар үйлчилж байв.

Соко-д энэ аялал их л сонирхолтой байгаа бололтой байсан. Охиноо бас далимд нь салхинд гаргаж байгаа нь хэрэгтэй юм даа гэж бодож явав. Сайхан аялаад ирлээ.

Cool XAML

2006-12-08T12:12:00.000+08:00

Сүүлийн хэд хоног XAML & WPF -н боломжуудыг сонирхож юм хийж үзлээ, vнэхээр хvчтэй хэрэгсэл болжээ. Ялангуяа компьютер графикийн мэргэжилтнүүд, хэрэглэгчийн интерфэйс зохиогчидод шинэ, шинэ хүчтэй боломжуудыг нээж өгсөн байна. Компьютер графикт авъяастай залуусыг хэрэглэгчийн интерфэйс зохиох ажил руу оруулвал их гоё гоё интерфэйсүүд хийж болохоор байна.

Өмнө нь macromedia зэрэг тусгай програмууд дээр л 3D animation-г хийх гэж оролдож байсан, application-д иймэрхүү боломжууд оруулна гэдэг нь маш төвөгтэй, бараг л мөрөөдөл байсан. Одоо түүнтэй дүйцэхүйц график интерфэйстэй програмуудыг хялбархан хийж болохоор байна.

Миний хувьд хэрэглэгчийн интерфэйс, график чиглэлээр нэг их юм хийж байгаагүй, энэ нь их цаг хугацаа авдаг, хүнд хүчир ажлууд санагддаг байсан. Сайндаа л нэг вэб интерфэйс дээр style sheet, skin, theme боломжуудыг хэрэглэж арай нэг давгүй интерфэйсүүд гаргаж байсан. Интерфэйс хийх шаардлага нь ч бага байсан юм байна, голдуу сервер логик, сүлжээний, өгөгдлийн сангийн програмууд л оролдож байж.

Одоо харахад вэб болон десктоп програмуудын интерфэйс хийхэд ер ялгаагүй нэг л XAML бичээд ашиглаж байна. Энэ нь сүлжээний орчны програмчлал, ялангуяа LAN орчинд cool интерфэйсүүд бүхий програмуудыг хийж болно гэсэн үг. Зарим нэг хуучин вэб интерфэйстэй болон Windows програмуудаа XAML дээр кодлож үзлээ. Браузер дээрээс том хэмжээний файл ачаалах, нэг үйлчилгээний вэб програм, цонхнуудын navigation гээд эхэлж туршиж үзсэн зүйлүүд үнэхээр давгүй байна, их боломжууд байгааг мэдэрч эхэлж байна. Цаашаа гүнзгийрүүлж судланаа.

Энд зарим сонирхолтой жишээ холбоосууд байна:
Sudoku тоглоом
http://msdn.microsoft.com/coding4fun/gaming/arcade/article.aspx?articleid=999781
Зурагт сэтгүүл
http://channel9.msdn.com/playground/wpfe/PageTurn/default.html